Waislamu wamkosoa Mfalme wa Saudia kumpa mkono mke wa Trump

TEHRAN (IQNA)-Hatua ya mfalme wa Saudia kumpa mkono mke wa Rais Donald Trump wa Marekani akiwa safarini mjini Riyadh inaendelea kukosolewa na Waislamu duniani.

Waislamu wa Sweden wameongeza sauti yao kulaani kitendo cha Mfalme Salman kumpa mkono Melania Trump alipowasili mjini Riyadh akiwa ameandamana na mume wake.

Kwa mujibu wa mwandishi wa IQNA, Waislamu wa Sweden kupitia mtandao wa kijamii wa Insagram wamebainisha kuvunjwa moyo na kitendo cha mtawala wa Saudia kukiuka maadili ya Kiislamu

Kauli kali zaidi zimetolewa katika akaunti ya Instagram yenye jina la Islamisket ambapo waliochangia wameashiria mafundisho ya Kiislamu ambayo yanaharamisha mwanamke Mwislamu kumpa mkono mwanaume ajinabi kama ambavyo mwanaume Mwislamu haruhusiwi kumpa mkono mwanamke ajinabi.

Maoni hayo yameungwa mkono na idadi kubwa ya watu katika ukurasa huo. Aidha nukta nyingine ambayo imewakasirisha Waislamu ni kuwa, mke wa Trump na wanawake wengine waliokuwa katika ujumbe wa mtawala huyo wa Marekani hawakuvaa hijabu wakati wakiwa ndani ya ardhi ya Saudi Arabia katika hali ambayo siku chache baadaye walipomtembelea Papa Francis katika makao ya Kanisa Katoliki Duniani huko Vatican walionekana wakiwa wamevalia vitambaa kichwani kama ishara ya kumheshimu kiongozi huyo wa Wakristo. Wakuu wa ofisi ya Trump wanasema ni sharti ya kiprotokali kwa wanawake kuvaa nguo ndefu nyeusi na kitambaa cheusi kichwani wakati wa kutembelea Vatican. Hatahivyo ofisi ya Trump imesema hawakutakiwa na wenyeji wao kuzingatia maadili ya mavazi ya Kiislamu walipotembelea Saudia..

Mtawala wa Saudia anakosolewa na Waislamu kwa kukiuka mafundisho ya Kiislamu kwa sababu yeye na watawala wengine wote wa ukoo wa Aal Saudi hujinadi na kudai kuwa wao ni wahudumu wa Haram Mbili Takatifu za Kiislamu za Makka na Madina zilizo katika ardhi ya Hijaz ambayo imepachikwa jina la ukoo huo na kuitwa Saudi Arabia.

3603277