د اسرائیلو جنایتکار رژیم په ناکامیو او ماتي کښې ډوب دی
ایکنانیوز د پارس ټو ډې له قوله راپور راکړ،د لبنان د اسلامي مقاومت غورځنګ حزب الله مشر سید حسن نصر الله پرون وویل اسرائیل د غزې د جنګ او د الاقصی د جګړې د سلو(۱۰۰) ورځو له تیریدا وروسته له ناکامیو او ماتیو سره مخامخ شوی دی او تراوسه یې هیڅ بریا نه ده لرلي.
حسن نصر الله پرون مازیګر د لبنان په جنوب باندې د صهیونیسټ رژيم په حملې کښې د دغه غورځنګ د یوه قومندان «وسام حسن طویل» چې په الحاج جواد » باندې مشهور و د شهادت د اوو ورځو د تیریدا په مناسبت وینا وکړه.
هغه د خپلې وینا په پیل کښې په تیرو سلو ورځو کښې د فلسطین د غزې تړانګې د خلکو بې ساري او اتلواله مقاومت ته په اشارې سره وویل: د غزې خلکو له نوښت څخه په ډک ډول او بې ساري توګه د صهیونیسټ رژیم د تیریو په مقابل کښې مقاومت کړی دی او د صهیونیسټ رژیم د رسنیو د چوپتیا او د حقیقتونو د پټ ساتلو په شرایطو کښې د مقاومت رسنیو د دوې د زړورتیاو په هکله د اطلاعاتو د رسولو په زمینه کښې مهم رول لوبولی دی.
د لبنان د حزب الله مشر حسن نصر الله زیاته کړه صهیونیسټ نیواکګرانو ته رسیدلي تاوانونه د دوې د روحیې د کمزوري کیدا او د ناکامۍ سبب شوي دي چې نوی مورد یې له اسرائیلو سره د مقاومت د ځواکونو په سل ورځې جنګ کښې د څلورو زره اسرائیلي عسکرو د معیوب کیدا اعلانیدل دي او ممکنه ده دغه شمیر شل زره معیوبانو ته ورزیات شي.
هغه په دې خبرې باندې ټینګار سره چې د سلو ورځو له تیریدا وروسته صهیونیسټ رژيم وايي دریم پړاو ته ورننوتلی دی چې پکښې د غزې تړانګې له شمال څخه شاتګ شامل دی وویل د صهیونیسټ رژیم د عسکرو له شاتګ وروسته د حماس او د جهاد اسلامي غورځنګونو مجاهدانو د دغه سیمې کنټرول په لاس کښې واخیست.
له دغه چارې وروسته اسرائیلو کومه بریا لاس ته راوړي ده؟
اسرائیل ونه توانید د فلسطین مقاومت ډلې له مینځه یوسي او همدا اوس اسلامي مقاومت د غزې تړانګې ټولې سیمې په لاس کښې لري او اسرائیل حتی ونه توانید د غزې له شمال څخه په تل ابیب باندې د توغندیو د ویشتل کیدا مخه ونیسي او یا حتی خپل یو بندي له حماس غورځنګ څخه ژوندی ازاد کړي.
د حزب الله مشر حسن نصر الله دغه راز په دې خبرې باندې ټینګار سره چې په یمن حمله د امریکا او د بریتانیا لیونتوب دی وویل امریکا وايي چې د جنګ د پراخولو هڅه نه کوي خو دغه کار ترسره کوي.
هغه وویل دا یو لیونتوب دی او که چیرې د امریکا ولسمشر بایډن او د هغه ملګري داسې فکر کوي چې وبه توانیږي په سره سمندر کښې د یمن د پوځ اقدامات بند کړي نو په غلطه دي ځکه چې امریکا د یمن خلک، مشران او تاریخ په ښه ډول نه پيژندي.
